Австралија објави десетгодишен план за двојно зголемување на флотата на воени бродови и зголемување на трошоците за одбрана за дополнителни 11,1 милијарди австралиски долари.
Министерот за одбрана Ричард Марлс во вторникот рече дека планот на владата на крајот ќе ја зголеми борбената флота на морнарицата со 26 нови бродови, што е најголема бројка од крајот на Втората светска војна.
Тој ја наведе загриженоста за зголемените геополитички тензии додека конкуренцијата меѓу Соединетите Држави, нејзините сојузници и Кина се „загрева“ во азиско-пацифичкиот регион.
Според новиот план Австралија ќе добие шест фрегати од класата „Хантер“, 11 фрегати за општа намена, три разурнувачи за воздушна борба и шест модерни борбени бродови без екипаж.
Дел од флотата ќе биде вооружена со ракети „Томахавк“ способни за удари со долг дострел на цели длабоко во непријателската територија – засилувајќи ја способноста за одвраќање.
– Тоа е најголемата флота што ќе ја имаме од крајот на Втората светска војна, изјави Марлс пред новинарите.
– Она што е исклучително важно да се разбере е дека додека гледаме напред, со неизвесен свет во однос на конкуренцијата на големите сили, ќе имаме драматично поинаква способност во средината на 2030-тите од она што го имаме сега. Тоа е она што го планираме и тоа е она што го градиме, додаде тој.
Најавата доаѓа како дополнување на плановите да се купат три нуклеарни подморници дизајнирани од САД за 92 милијарди долари – што ќе придонесе Канбера да ги зголеми трошоците за одбрана на 2,4 проценти од бруто домашниот производ (БДП), над целта од 2 проценти што ја поставија сојузниците во НАТО.
