Австралиската министерка за надворешни работи Пени Вонг изјави дека Канбера ќе разгледува признавање на палестинска држава, што претставува промена во австралиската политика. Ова се моменти кога меѓународната заедница бара решение со две држави за да се стави крај на израелско-палестинскиот конфликт.
Вонг го поддржа британскиот министер за надворешни работи Дејвид Камерон кој рече дека признавањето на палестинската држава, вклучително и во Обединетите нации, ќе го направи решението со две држави неповратно.
– Решение со две држави е единствената надеж да се стави крај на бескрајниот циклус на насилство, рече шефицата на австралиската дипломатија, говорејќи на Австралискиот национален универзитет.
Таканареченото решение за две држави долго време беше камен-темелник на меѓународните мировни напори за решавање на долгиот израелско-палестински конфликт, но процесот беше закочен цела деценија дури и пред актуелната војна во палестинската енклава Појасот Газа, каде Израел тврди дека војува против милитантното движење Хамас.
Шпанија е меѓу другите западни земји кои се залагаат за такво признавање и е главен поборник за таков потег во рамките на Европската унија.
Вонг рече и дека „оние кои тврдат дека признавањето го наградува непријателот“ грешат, бидејќи сопствената безбедност на Израел зависи од решението со две држави.
– Нема долгорочна безбедност за Израел доколку не биде признаен од земјите од неговиот регион, рече мислејќи на арапските земји во регионот кои не го признаваат постоењето на еврејската држава.
