Во организација на Македонското учителско друштво на Викторија се одржа традиционалното свечено доделување на дипломите за положен матурски испит по македонски јазик за учениците од 12-то одделение, кои го посетувале саботното училиште на Victorian School of Languages (VSL) во Томастаун и во Килор Даунс. Поради ковид ситуацијата оваа церемонија веќе втора година се одржа преку конференциска видео-врска (Zoom).
Настанот го отвори претседателката на Македонското учителско друштво на Викторија, г-ѓата Јованка Смилевска, а потоа обраќање до матурантите имаше и директорот на Викториското училиште за јазици, г-динот Френк Мерлино.
Генералниот конзул на Македонија, г-ѓа Сања Зографска се приклучи кон честитиките до матурантите и им предложи да основаат здружение за негување на македонскиот јазик кое би ги опфатило не само завршените матуранти туку и оние што се уште се во училишните клупи. Целта е да се зачува нашиот мајчин јазик кај новите генерации родени во Австралија.
Координаторката на наставата по македонски во Томастаун, г-ѓа Љубица Талевска ги претстави учениците кои матурираа по македонски јазик во ова училиште: Александер Марковски, Ангелина Тасески, Антонио Бентовски, Кристофер Трајчески, Давид Соколевски, Јован Петрушевска, Марта Стаматовска, Мартин Пејчиновски и Стефани Стојанов.
Матурантите од Килор Даунс ги промовираше координаторката за тамошната настава по македонски, г-ѓата Весна Дамчевска, а тоа се: Татијана Гроздановска, Димитар Лазаревски, Даниел Мирчески, Амилија Ристевски, Владимир Симоновски, Кира Талеска, Симона Митреска и Благоја Талевски.
Наставничките Талевска и Дамчевска со многу љубов и лична поврзаност за секој матурант ги истакнуваа поединечните квалитети по кои тие се истакнувале во саботната настава, особено во текот на последните две завршни години.
Со куси поздрави се приклучија и челниците на центрите на VSL во двете училишта, г-динот Калаф Греис (Томастаун) и г-динот Садик Чадаш (Килор Даунс).
На крајот сите уште еднаш им честитаа на матурантите и им посакаа успех во нивните понатамошни кариери.
