Претседателот на Владата Христијан Мицкоски заедно со заменик-претседателот на Владата и министер за транспорт Александар Николоски извршија надзор во работата на автопатската делница Гостивар – Букојчани (дел од Коридор 8).
Според официјалните податоци, автопатските делници од коридорите 8 и 10Д се со планирана должина од 109 километри. Треба да се изградат 24 подвозници и 34 надвозници. „Бехтел и Енка“ треба да изградат и мостови во вкупна должина од 4.500 метри (4,5 километри). При градежните активности треба да се ископаат и извадат 21 милион километри кубни земјиште, камења и карпи.
Но аванси без никаква реализација од страна на „Бехтел и Енка“ нема да бидат исплаќани, туку ќе се плаќа врз основа на реализација. Со Ребалансот на Буџетот за годинава, парите наменети за делиниците што ги гради „Бехтел и Енка“ се драстично намалени – од 249 милиони евра на 66 милиони.
– Илузорно е да се планираат 250 милиони евра за проектот за коридорите 8 и 10д во ситуација кога не може да се заврши експропријација, има еден куп проблеми, и кога не се знае трасата, односно кога се знае дека предвиденото нема да се реализира и тие пари на крајот на годината да завршт во некои коруптивни зделки – кажа министерката за финансии Гордана Димитриеска Кочоска, додавајќи дека за следната годината за овој проект ќе бидат планирани 250 милиони евра и дека веќе се работи на тоа проектот да почне да се реализира, да се гради и да се плаќа врз основа на завршени работи и ситуации.
Но се наметнува прашањето дали во иднина постои ризик да не се продолжат активностите на терен од страна на „Бехтел и Енка“ поради неисплаќање на договорената сума.
Од страна на актуелната влада повеќе пати беше посочувано дека иако претходната Влада имала префрлено милиони евра на „Бехтел и Енка“, немало никаков напредок на работите на терен.
„Бехтел и Енка“ на сметката добиле за цела 2023 година вкупно околу 240 милиони евра.
Но, како што покажува извештајот за сработеното до август, во 2024 година компанијата немале добиено ниту денар буџетски средства.
Македонија – клучка на три крстосници
– Преговорите заедно со раководството на компанијата „Бехтел“ започнаа уште при оние контакти во Вашингтон, кога бев на Самитот на НАТО, а продолжија тука. Кога има дијалог, кога ќе се разговара, може да се постигне и напредок. Во четирите изминати месеци откако е формирана Владата, а во споредба со претходните две години, на теренот се направени двојно, тројно повеќе работи, со што реалност е дека Македонија ќе биде држава домаќин на три крстосници – транспортна, железничка и енергетска, оцени понатаму Мицкоски. Државата не излегува на море и тој недостаток треба да го направиме наша предност, рече премиерот, „бидејќи сме природна крстосница на два многу значајни коридори, Коридорот 8 и Коридорот 10“.
Министерот за транспорт Александар Николоски посочи дека од Скопје до Охрид ќе се патува за најмногу час и половина и додаде дека со оваа делница практично ќе се реши најтешкиот дел од она што треба да е автопат Скопје-Кичево-Струга-Охрид.
Директорот на Државни патишта, Коце Трајановски, кажа дека експропријацијата на имотите низ кои треба да поминува автопатот е во тек и дека досега е завршена половината. Остануваат околу 2.400 предмети кои треба да финишираат до Нова Година.
Од „Бехтел и Енка“, пак, се задоволни што најголем дел од подизведувачите се македонски компании.
