Администрацијата на американскиот претседател Џо Бајден најави дека ќе прогласи крај на здравствената криза предизвикана од ковид-19 на 11 мај, три години откако САД воведоа строги епидемиолошки мерки за спречување на ширењето на болеста.
Вонредната состојба и јавната здравствена криза во земјата поради пандемијата на коронавирус беше прогласена во 2020 година од администрацијата на претседателот Доналд Трамп во тоа време, но Бајден ја продолжуваше, што им овозможи на милиони Американци да добијат бесплатно тестирање, вакцини и лекови против ковид-19.
Канцеларијата за менаџмент и буџет на Белата куќа (ОМБ) соопшти дека вонредната состојба наскоро ќе истече, но ќе биде продолжена до 11 мај, а потоа ќе заврши.
Со укинувањето на вонредната здравствена криза, лековите и вакцините повеќе нема да бидат бесплатни. Белата куќа сака здравствените работници да можат да се подготват за низата промени што ќе следат.
Бројот на заразени луѓе во САД опаѓа, иако околу 500 луѓе умираат од (или со) ковид-19 секој ден, според владини податоци. Од почетокот на 2020 година до средината на 2022 година, ковид-19 беше третата водечка причина за смрт во САД, но сега веќе не е ниту во првите пет „убијци“, соопштија федералните власти.
