Во петокот, под раководство на јавен обвинител од Основното јавно обвинителство за гонење на организиран криминал и корупција, во Струга е спроведена акција во која е лишен од слобода И.Р.(27) со македонско – австралиско државјанство. Акцијата е резултат на меѓународна соработка со австралиската федерална полиција и полициските сили од Западна Австралија.
Предметниот јавен обвинител, постапувајќи по кривичната пријава поднесена од страна на Министерството за внатрешни работи, во петокот донесе Наредба за спроведување на истражна постапка против лицето поради постоење на основано сомнение дека сторило кривично дело “Злосторничко здружување“ и кривично дело “Неовластено производство и пуштање во промет наркотични дроги, психотропни супстанции и прекурсори“.
Осомничениот во временскиот период од почетокот на месец август 2021 година до почетокот на месец септември 2021 година со цел неовластено купување, пуштање во промет и посредување во продажба на наркотична дрога – метиламфетамин и кокаин, создал меѓународна криминална група на која припадници станале петмина австралиски државјани кои дејствувале на територијата на Западна Австралија. Секој член на групата имал своја улога на купување, продажба, посредување во купопродажба, нудење на продажба и пренесување на наркотичната дрога, со цел понатамошна продажба.
Македонскиот државјанин, како што брифираше Обвинителството, користејќи различни платформи преку енкриптирачки мобилни уреди пристапувал и комуницирал под псевдоними и притоа, во критичниот период, договорил неовластено купување на 10 кг метиламфетамин по цена од 2.400.000 австралиски долари, неовластено посредување на 37 кг метиламфетамин во вкупна вредност од 8.880.000 австралиски долари и 7 кг кокаин по цена од 2.240.000 австралиски долари за вкупната количина кокаин. Купопродажбата и примопредавањето на дрогата се одвивала преку австралиските членови со кои се договарал за местото, времето и начинот на преземање и плаќање на истата.
Во акција спроведена на 31 август и 1 септември 2021 година на територијата на Австралија, од страна на полицијата на ЗА се лишени од слобода 13 австралиски државјани и против истите се води кривична постапка пред австралиските надлежни органи, брифира понатаму Обвинителството.
Во изминатиот период доказите обезбедени од австралиските власти преку меѓународна правна помош биле доставени до Основното јавно обвинителство за гонење на организиран криминал и корупција. Петочната акција во Струга е резултат на претходно спроведена постапка.
На предлог на Обвинителството судијата на претходна постапка при Основниот кривичен суд Скопје на осомничениот му определи мерка притвор во траење од 30 дена.
