Повеќе од деценија ипол од време навреме се појавуваа желби и идеи за возобновување на поранешната ју-лига, па и проширување во балканска лига како регионално натпреварување кое ќе го крене фудбалот на тие простори, но секоја идеја запираше на стартот – УЕФА беше таа што не дозволуваше. Ама, тоа за три години можно е да се промени, пишуваат медиумите од Балканот.
Регионалните лиги како спас за малите земји живеат како идеи од Скандинавија, Бенелукс, Источна Европа и Балтикот и посебно на Балканот и најблизу до реализација беше белгиско-холандската лига (БеНЕ-лига) која влезе во завршна фаза пред Холанѓаните да се откажат. Дека нешто се крчка зад кулисите деновиве објави тренерот на белградска Црвена Звезда, Милош Милојевиќ, кој помалку и шокантно откри дека веќе има план за регионализација на европскиот фудбал и тоа од 2025 година и дека се работи на планот, а информациите му се од Шведска, каде работеше пред да дојде во Белград.
– Има план за регионална лига за 2025 година. Е, сега јас не знам во кој регион би влегла Србија, но мислам дека треба да се задржи квалитетот на домашните првенства. За ова мене ми говореше претседателот на Малме, кој е во некој борд на УЕФА. Детали не знам, знам само дека УЕФА е таа која за сè одлучува и многу-многу нема да нè прашува, рече Милојевиќ.
Последна идеја за Балканска лига дојде од Бугарија под назив МЕГА-лига во која треба да игра цел Балкан – од Турција, Грција, бивша Југославија, Романија, Бугарија и Унгарија – лига која може да донесе огромни приходи од ТВ-права поради регионот со над 150 милиони жители. За регионализација се залагаа и „суперлигашите“ во проектот кој пропадна лани за 48 часа, а главниот творед Флорентино Перез тогаш најави дека Суперлигата ќе донесе тектонски промени во кои и Балканската лига како идеја за подобар фудбал треба да се формира.
Сепак, настрана безбедноста која постојано се посочуваше како главна пречка, проблем е вклопувањето на календарот особено откако УЕФА веќе воведе трето натпреварување како Конференциската лига, а за две години сите три натпреварувања ќе се прошират на по 36 екипи и ќе се зголеми бројот на мечеви во сезоната, па тешко ќе биде да се вклопи дополнително натпреварување.
– Домашните лиги треба да се задржат, но ако во нив нема доволен квалитет, нема доволна посета и со тоа нема доволна заработка, јас сум за да се формира нешто што ќе носи повеќе пари и квалитет. Гледано само од фудбалски аспект нема некој што не е “за“ ако донесе подобар фудбал, да се игра на подобри стадиони, на подобра инфраструктура, сè тоа би било поинтересно. Ама не е само фудбалскиот аспект, има и други аспекти, посебно политички за кои јас сум лаик, додава Милојевиќ.
За ваквите планови на УЕФА засега не се појавиле никакви информации, ни за почетни размислувања, а уште помалку за некакви конкретни дела и исцртување на регионални граници при формирањето на регионалните лиги.
