Вториот по ред Македонски јуниорски куп ќе се одржи оваа сабота и недела, на 5 и 6 октомври. Организатор на купот е Пленти Вали Лајонс, кој овогодишните натпревари ќе ги организира на стадионот на Престон Македонија, на B. T. Connor Reserve, 200 Broadhurst Avenue Reservoir.
Покрај организаторот Пленти Вали Лајонс учество ќе земат и Алтона Маџик Вардар, Престон Македонија, Сиднам Парк Македонија, Џилонг Македонија, Лајло Јунајтед Слога, Нобл Парк Македонија и Кило Волци. Единствен клуб што нема да учествува од Викторија е Шепартон Македонија, која во последен миг се откажа од своето учество.
Првпат купот се одржа минатата година на стадионот на Сиднам Парк Македонија. По Пленти Вали Лајонс чест да организира ваков куп ќе има Лајло Јунајтед Слога.
Организаторите на купотот се благодарни што Престон Македонија им овозможи да се одржи настанот на нивното игралиште кое е поголемо и ќе овозможи во исто време да се игра на четири терени.
